طريقه عمل( الفشه والكلاوى والقلب الضانى،البطاطس المحمره على طريقه المطاعم ، والكبده المشويه)

المقادير :- 

☆فشه ضانى
☆كلاوى ضانى
☆قلب ضانى
☆بصله
☆فلفل اسود صحيح
☆ملح
☆ورق لورا
☆مستكه
☆حبهان

طريقة التحضير :- 

نغسل الكلاوى والفشه والقلب كويس جدا وبعدين ننقعهم فى ملح وخل وليمون عشان نزيل الريحه لمد20 دقيقه ، وبعدين نغسلهم كويس ونسيبهم يتصفوا فى مصفى ، بعدين هنجيب حله ونحط فيها ميه وهنقطع البصله لاربع اجزاء ونحطها فى الحله اللى فيها الميه ونسيبها تغلى ،بعدين هنحط البهارات ونسيبها تغلى خمس دقايق،بعدين ننزل بالفشه والقلب والكلاوى فى الميه المغليه المضاف اليها البصل والبهارات ،بعد ما نتاكد من ان الفشه والكلاوى والقلب كلها استوت نرفعها من الحله ونسيبها تبرد شويه وبعدين نبدا بالتقطيع .
بعدالتقطيع هنجيب طاسه فيها زبده او زيت او ليه خروف متسيحه وننزل فيها زبده او زيت او ليه خروف متسيحه وننزل فيها الفشه والكلاوى والقلب ونقلبهم طويس لغايه ماتتحمر كويس من كل الجوانب ، بعد التحمير هنرش على الوش البقدونس المفروم هيدى شكل وطعم حلو وهنقدمها مع السلطه والعيش البلدى وبالهنا والشفا.

ثانياً :- طريقة عمل البطاطس كالمطاعم :-

المقادير :- 

☆كيلو بطاطس
☆فنجان خل
☆ماء وملح

طريقة التحضير :- 

قطعيها صوابع متساويه بايدك على لوح التقطيع اوباداه تقطيع البطاطس،اغلى ميه بملح وبعد ماتغلى على طول حطى الخل مباشره،حطى البطاطس فى الماء الغلى وغطيهاوسبيها خمس دقايق بعد كده طلعيها او سبيها فى الميه دقيقتين كمان مش اكتر ،بعدين صفى البطاطس كويس من الميه واقليها مباشره فى الزيت،ولازم يكون زيت غزير ،تقدرى تكررى الطريقه نفسها مع الشبسى بشرط تقطعيها لشرايح رفيعه جدا بايدك او بأداه تقطيع البطاطس وقدميها مع الكاتشب والمايونيز

ثالثاً :- طريقة عمل الكبده المشويه بطريقه مميزه :-






المقادير :- 

☆كيلو كبده مقطعه شرايح
☆4معلقه كبيره خل
☆4معلقه كبيره مستطرده
☆2معلقه ثوم مفروم
☆1معلقه ملح
☆1معلقه فلفل اسود
☆2معلقه كبيره كمون
☆2معلقه كبيره كزبره ناشفه
☆4 ليمونات
☆معلقه صغيره شطه
☆معلقه صغيره بابريكا
☆4معالق زيت ذره

طريقه التحضير :- 

اخلطى كل التوابل دى مع بعض وضيفى عليهم المسطرده والخل وعصير الليمون،اخلطى شرايح الكبده فى التتبيله السابقه لمده ساعه، فى طاسه على النار حطى اربع معالق زيت ذره وحمرى فيها الكبده او لو عندك شوايه اشويها عليها ، وقدميها مع شرايح الخضار المشوى والارز الابيض وبالهنا والشفااااا.

رابعاً :- طريقة عمل الكبده الاسكندرانى بطريقه مختلفه :-



المقادير :- 

☆نص كيلو كبده بلدى
☆بصله متوسطه الحجم متقطعه خشن
☆فلفل الوان
☆5فصوص ثوم مفرومين
☆2 قرن فلفل حامى
☆1معلقه صغيره كزبره مطحونه
☆ملح وفلفل أسود حسب الرغبه
☆ربع معلقه صغيره جوزه الطيب
☆نص معلقه صغيره كزبره ناشفه
☆سمن أو زبده حسب الرغبه

طريقة التحضير :- 

هنقطع الكبده شرايح رفيعه جدا بالطول أو حسب الرغبه المهم تكون قطع صغيره صغيره فى الحجم،  بعدين هننقعها فى معلقتين كبار خل ونسيبها فى الخل مده ربع ساعه ، فى طاسه على النار هنشوح البصل فى السمن أو أى ماده دهنية تفضليها لغايه مايدبل، وبعدين هننزل بالثوم المفروم ونشوحهم مع بعض لمده دقيقتين وبعدين ننزل بالفلفل الحامى والفلفل الالوان نقلبهم مع بعض كويس لمده 3 دقايق وبعدين هنحط الكبده ونسيبها مده دقيقه عشان تاخد الصدمه .
بعدين نقلبها كويس لغايه مايتغير لونها، بعدين هنحط الملح والفلفل والكزبره الناشفه وجوزه الطيب ونقلبهم مع بعض كويس ، هنغطى الكبده ونسيبها تشرب ميتها، هنضيف عليها ربع كوب ميه عشان تستوى كويس ومتكونش نيه،  هنسيبها مره تانى على نار متوسطة  لغايه ما تشرب الميه خالص،  بعدين هنرفعها من على النار، تقدم مع المكرونه الاسباجتى بصوص الطماطم أو أى نوع مكرونه أنتى بتفضليه وبالهنا والشفا.

-شاهد أيضاً :- طريقة عمل طاجن باميه باللحمه الضانى وطاجن عكاوى بورق العنب وطاجن تورلى.


إرسال تعليق

0 تعليقات