طريقه عمل( كيكه المج بدون فرن ، كيكه النسكافيه )

كيكه المج

⊙المقادير :- 

☆ 1/2كوب حليب
☆كوب إلا ربع سكر
☆نصف كوب كاكاو خام
☆كوب دقيق
☆كوب إلا ربع زيت
☆رشه ملح
☆معلقه صغيره بيكنج بودر
☆معلقه صغيره فانيليا
☆2 بيضه

ملحوظه مهمه:-

-تقدرى تستخدمى أى نوع مج

-للتزيين :- 

- هنستخدم صوص الشيكولاته، وكريم شانتيه

⊙طريقه التحضير :- 

فى الخلط هنضيف الحليب مع السكر والكاكاو الخام والزيت وهنضربهم كويس، بعد مانخلص هيكون معانا صوص شيكولاته حلو جدا هنشيل مقدار كوبايه على جمب عشان هنستخدمها فى تزيين الكيك، هنرجع تانى للخليط وهنضيف عليه البيض والفانيليا وهنضربهم كويس جدا لمده 3 دقائق، هنسكب الخليط فى وعاء كبير وهنضيف عليه الدقيق والبيكنج بودر ورشه الملح ونخلط المكونات كلها مع بعض كويس جدا، لو حسيتى أن الخليط ثقل ممكن تضيفى إليه معلقه أو معلقتين دقيق ، هنجيب المجات اللى هنعمل فيها الكيك وندهنها حاجه بسيطه زيت، وبعدين نبدأ نحط خليط الكيك ونراعى أن أحنا منملاش المج على الآخر لأنه هيرتفع أثناء السوا ، هنجيب حله ونحط فيها ميه مغليه، وبعدين هنرص كوبايات المج داخل الحله بحيث توصل الميه لنص إرتفاع المج، هنغطى الحله بفوطه نظيفه وبعدين هنحط فوقها غطا الحله، ومننساش نرفع أطراف الفوطه عشان ماتتلامسش مع النار،  الخطوه دى مهمه جدا لأ نها بتمنع تسريب أى هواء للكيك أثناء السوا، هنسيب الحله على نار هاديه جداً لمده نص ساعه، وبعدين هنسيبها تبرد خالص، أول ما تبرد هنحط صوص الشيكولاته أو كريم شانتيه أو الاثنين معا ، لعمل كريم شانتيه هنخلط نص كيلو كريمه لبانى مع نص كوب سكر بودره وربع كوب ثلج مجروش ومعلقه صغيره فانيليا، هنخلط جميع المكونات فى الخلاط أو محضر الطعام وتضرب حتى نحصل على كريم شانتيه متجانس القوام، ونراعى عدم المبالغة فى الضرب، حتى تكون هشه ومتماسكه وفى نفس الوقت مش سميكه، هنحطها فى الفريزر حتى الإستخدام،وبالهنا والشفا.

☆ثانياً :- طريقه عمل كيكه النسكافيه :-

كيكه النسكافيه

⊙المقادير :- 

☆2كوب دقيق
☆معلقه كبيره بيكنج بودر
☆رشه ملح
☆كوب سكر
☆3 بيضات
☆معلقه صغيره فانيليا
☆1/2كوب زيت
☆كوب لبن
☆2 معلقه كبيره نسكافيه
☆معلقه كبيره كاكاو

-لعمل الصوص :- 

☆كوب شيكولاته مبشوره
☆معلقه كبيره قهوه سريعه الذوبان
☆معلقه كبيره زبده
☆1/2كوب لبن

⊙طريقه التحضير :- 

فى الخلاط هنحط السكر مع الزيت واللبن ونخلطهم مع بعض لغاية السكر مايدوب وبعدين هنضيف البيض تدريجياً ونخلطهم مع بعض كويس وبعدين نحط الفانيليا ونرجع نخفق مره تانى، بعدين نضيف النسكافيه والكاكاو ونضربهم مع بعض كويس قوى ، هنخلط المكونات الجافه مع بعض وهى الدقيق والبيكنج بودر ورشه الملح، ونخلطهم مع بعض بالمضرب اليدوى، وبعدين نحط المكونات السايله ونقلبهم مع بعض كويس جدا بالمضرب اليدوى، هنجيب صنيه مغلفه بورق الزبده أو مدهونه زبده وعليها رشه دقيق وهنزل خليط الكيك وندخله فرن سبق تسخينه على درجه حراره 180 لمده نص ساعه، وبعدين هنحط الصوص على وش الكيك، لعمل الصوص هنحط فى حله على النار اللبن وعليه الزبده وهو سريعه الذوبان هنخلطهم مع بعض كويس قوى، ونقلبهم مع بعض لمده خمس دقايق وبعدين هنرفع الخليط من على النار ونحط عليه الشيكولاته المبشوره ونفضل نقلب لغايه الشيكولاته ماتذوب، وبعدين نحطه على الكيك بعد ماتبرد وبالهنا والشفاااا.

شاهد أيضاً :- طريقه عمل كيكه الريد فيلفيت وكيكه جوز الهند بالشربات. 


إرسال تعليق

0 تعليقات