الأكلات الشعبية المصريه( مسقعه باللحمه المفرومه ، والبابا غنوج )

مسقعه باللحمه المفرومه 

⊙المقادير :- 

☆100 جرام لحمه مفرومه
☆باتنجان مقطع حلقات
☆بطاطس متقطعه حلقات
☆ثوم مفروم
☆فلفل أخضر حار(أختيارى)
☆فلفل رومى
☆عصير طماطم
☆معلقه كبيره خل
☆ملح وفلفل أسود
☆كمون
☆بهارات لحمه (ممكن نستخدم جوزه الطيب ،الجنزبيل مطحون،توم بودر، بصل بودر،بابريكا، زعتر)

⊙طريقه التحضير :- 

هنحمر البطاطس والباتنجان والفلفل الأخضر والفلفل الرومى فى طاسه بها زيت غزير على نار متوسطة، فى آناء آخر هنشوح بصله متوسطه مع معلقتين زيت أو زبده وهنقلبهم كويس وبعدين هنحط الثوم المفروم والبهارات وهنقلب ، ممكن نحط عليهم فلفل أخضر مفروم للناس اللى بتحب الأكل سبايسى،وبعدين هننزل باللحمه المفرومه ونقلبها كويس لغايه لونها مايتغير بعدين هحط الملح والفلفل الأسود واسيبها على النارلغايه ماتستوى .
 فى طاسه كبيره هنشوح حوالى 5 فصوص ثوم مفرومين مع ملح وشطه هنقلبهم لغايه مايتغير لون الثوم للون الذهبى وبعدين هننزل عليهم بعصير الطماطم والصلصه،ونقلبهم مع بعض ونسيب الصوص لغايه مايغلى وبعدين نحط معلقه الخل ونرفع الخليط من على النار ، بعدين هنجيب صنيه فرن هنحط فى الصنيه شويه صغيرين من صوص الطماطم وفوقيهم هنرص راق من الخضار المقلى فى الزيت وبعدين هنحط فوقيه راق من اللحمه المفرومه وبعدين صوص الطماطم بعديها هنحط تانى راق من الخضار المقلى فى الزيت وفوقيه راق من اللحمه المفرومه واخيراً هنحط صوص الطماطم، وممكن ترصيها بالطريقه اللى تناسبك بس المهم الخضار المقلى من تحت واللحمه المفرومه من فوق وندخلها الفرن ونسيبها مده 10دقايق وبعدين نطلعها عشان التقديم .

[طريقه أخرى] :-

-ممكن نعملها بنفس الطريقه بس من غير لحمه مفرومه ومن غير ماندخلها الفرن،  بالنسبه للناس اللى بتعمل دايت ممكن تقطعوا الباتنجان المتقطع حلقات والفلفل والبطاطس الحلقات فى صنيه وندهنهم زيت وندخلهم الفرن وبعدين نحطهم فى الصلصه عشان يكملوا سوى  بكده  هنعمل مسقعه خفيفه ومفهاش كميه الزيت الكتير اللى بيبقى موجود عاده فى المسقعه وبسعرات حراريه قليله وبالهنا والشفا.

☆ثانياً :- طريقه عمل البابا غنوج :-

بابا غنوج

⊙المقادير :- 

☆كوب باذنجان مشوى محفوظ سابقا فى الثلاجة
☆1 حبه فلفل رومى مشوى منزوع القشره
☆معلقه كبيره خل
☆1/2 كوب زبادى
☆ربع كوب طحينه
☆نص ملعقه صغيره ثوم مفروم
☆معلقه كبيره عصير ليمون
☆نص معلقه ملح
☆نص معلقه صغيره كمون
☆معلقه كبيره خضره متقطعه صغير جدا(شبت وبقدونس وكزبره ناشفه )
☆معلقه كبيره زيت زيتون أو أى نوع أخر متوفر عندك

⊙طريقه التحضير :- 

هنشوى الباتنجان على عين البوتاجاز من فوق وممكن ندخله الفرن لو حابين، بعدين هنسيبه يبرد خالص ،وبعد مايبرد هنقشره ونقطعه حتت صغيره ونصفى الميه بتاعته بعدين نحطه فى التلاجه عشان يتماسك شويه ، بعدين هنشوى الفلفل الرومى على البوتاجاز من فوق أو ندهنها زيت وندخلها الفرن عشان تتشوى، وبعد ماتبرد نشيل القشره الخارجيه ونفرمها فى الكبه ، فى وعاء هنخلط الباتنجان المتقطع مع الفلفل المفروم فى الكبه والزبادى والطحينه والثوم المفروم وعصير الليمون والخل والملح والكمون والخضره ونقلبهم مع بعض كويس وبعدين هننزل زيت الزيتون ونقلب وبالهنا والشفا.

- شاهد أيضاً :- طريقه عمل شوربه العدس والبصاره




إرسال تعليق

0 تعليقات