الأكلات الشعبية فى مصر (شوربة العدس، البصاره،)

شوربه العدس

{ المقادير } :- 

☆1/2 كيلو عدس
☆زبده او سمن
☆1 بصله متوسطه الحجم متقطعه شرايح
☆4 فصوص ثوم
☆1جزره متقطعه حلقات
☆قرن فلفل حار (أختيارى)
☆1 حبه طماطم كبيره الحجم متقطعه
☆1مكعب مرقه دجاج
☆ملح وكمون فقط
☆خبز محمص

للطشه :- 

☆4 فصوص ثوم +كزبره ناشفه مطحونه +زبده أو سمنه

{ طريقه التحضير } :- 

فى حله على النار هنشوح البصل مع الزبده او السمن حسب الرغبه لمده دقيقتين وبعدين ننزل بالثوم هنقلبهم  مع بعض شويه وبعدين ننزل بالعدس بعد مانغسله ونصفيه من الميه ، هنقلبه تقلبتين وبعدين هننزل بالجزر والفلفل الحار والطماطم ممكن تبشريها وممكن تقطعيها لأربع أجزاء ، ده نقلب كل المكونات دى مع بعض لمده خمس دقايق وبعدين هننزل بالميه ومعاها مكعب مرقه دجاج وملح وكمون ، وهنسيبهم على النار يغلوا مع بعض لغايه الخضار كله ما يستوي.
 أتاكدى إن كل الخضار استوى وبعدين هنرفعه من على النار وهنسيبه يبرد شويه وبعدين هنضربه فى الخلاط أو محضر الطعام لغايه ما يبقى يبقى معانا خليط متجانس ،اسكبى العدس فى وعاء كبير  ، وبعدين فى طاسه على النار هنحط معلقه سمن أو زبده وهنشوح فيها الثوم والكزبره الناشفه لغايه الثوم مايحمر الثوم ويبقى لونه ذهبى جميل ، هنحط الخليط (الطشه ) فوق العدس،  هنجيب بوله غويطه هنحط فيها الخبز المحمص وبعدين هنحط عليه العدس ، يقدم العدس مع اللفت المخلل والسلطة الخضراء  وبالهنا والشفاااا.

ثانياً :- طريقه عمل البصاره :-

البصاره

{ المقادير } :- 

☆1كوب فول مدشوش
☆كرفس
☆كرات
☆ملح وشطه وكمون
☆زبده أو سمنه
☆1 بصله متقطعه شرايح
☆خضره (بقدونس، شبت، كسبره)مفرومه

{ طريقه التحضير } :- 

فى وعاء على النار هنشوح البصل مع الزبده او السمن حسب الرغبه لمده دقيقتين وبعدين ننزل بالثوم المفروم هنقلبهم مع بعض شويه  ، هننزل بالفول المدشوش ونقلب مره اخرى ، بعدين هنحط الخضره (الشبت والبقدونس والكرفس) ويكونوا مفرومين وكمان هنحط  قرن فلفل حامى هنقلبهم كلهم مع بعض تقلبتين وأول ما الفول المدشوش يبدأ يتحمص حاجه بسيطه هننزل بالميه ومعاها مكعب مرقه دجاج والملح والكمون .
هنسيب الخضروات لغايه ماتستوى وبعدين هنرفعهم من على النار، ونسيبهم يبردوا شويه ، وبعدين هنضربهم فى الخلاط أو محضر الطعام لغايه ما يبقى معانا خليط متجانس، اسكبى البصاره فى وعاء كبير،  فى طاسه على النار هنحمر فيها الثوم المفروم والكزبره الناشفه لغايه الثوم ماياخد اللون الذهبى الجميل ، هنحط الخليط ( الطشه ) فوق البصاره وبعدين هنقلب البصاره كويس ، هنحط على البصل المحمص على البصاره،  ونقدمها مع اللفت أو أى نوع أنتى تحبيه وبالهنا والشفاااا.

-شاهد أيضاً :- طريقه عمل مسقعه باللحمه المفرومه والبابا غنوج.













إرسال تعليق

0 تعليقات