أفكار جديده لعمل ساندوتشات المدارس


أفكار جديده لعمل ساندوتشات المدارس


☆فكره رقم 1:-

هنجيب جبنه بيضه أى نوع انتو بتفضلوه وهنحط عليها معلقه زيت زيتون او زيت ذره عشان تبقى سهله فى الفرد ونهرسها بإستخدام الشوكة هنجيب التوست أو الفينو أو الكيذر وهنحط طبقه من الجبنه وعليه طبقه من الانشون وفوقيها قطع من الزيتون المخلى.

☆فكره رقم2:-

هنعمل ساندوتشات المربى بالقشطة، هنعمل المربى فى البيت عشان نضمن ميكونش فيها أى مواد حافظة، هنجيب معلقتين مربى ومعاهم معلقتين قشطه وهنقلبهم مع بعض وبعدين هنحشى السندوتشات بخليط المربى والقشطه.

☆فكره رقم 3:-

 هنجيب بيضه مسلوقه ونحط عليها معلقه جبنه بيضاء وهنهرسهم مع بعض بواسطة الشوكة وبعدين هنجيب عيش الفينو أو الكيذر ونحشيه بخليط الجبنه البيضاء مع البيض وهنحط عليهم قطع الزيتون المخلى والمتقطع حلقات ، ممكن نستبدل الزيتون بشرايح الخيار أو الخس.

☆فكره رقم 4:-

هنجيب بيضه مسلوقه مع حبه بطاطس مسلوقه وهنهرسهم مع بعض بالشوكه وهنحط عليهم رشه ملح وكمون، هنجيب العيش التوست أو عيش الفينو أو الكيذر ونحشيه بخليط البيض المسلوق مع البطاطس المسلوقه ومننساش نحط عليهم شرايح الخيار أو الخس أو حلقات الزيتون المخلى.

☆فكره رقم5:-

 هنجيب جبنه بيضاء وهنحط عليها معلقه زيت زيتون أو زيت ذره وعليها قطع صغيرة فلفل ألوان وكمان زيتون مفروم وهنحشي بيها الفينو أو الكيذر أو التوست.

☆فكره رقم 6:-

هنجيب طاسه على النار هنشوح فيها قطع البسطرمه أو الانشون وبعدين نضيف الفلفل الالوان ونقلب، وبعدين هنحط البيض المخفوق وعليهم رشه ملح وفلفل اسود ونقلب لغايه البيض مايستوى، و بعدين هنجيب العيش الفينو أو الكيذر ونحشيه بالبيض بالبسطرمه.

☆فكره رقم 7:-

 هنجيب قطع دجاج مستوى ومتقطع قطع صغيره ونحط عليها مايونيز ومعلقه كزبره خضراء وعصره ليمونه وملح وفلفل أسود، هنقلبهم مع بعض بعدين هنحط قطع الافاكادو ونقلبهم مع بعض ،هنجيب عيش شامى وهنفرد عليه الخليط ونلفه كويس وبعدين هنحطه على الشوايه عشان ياخد اللون الدهبى بعدين قلبيه على الجانب الآخر وقدميه لاولادك.

☆فكره رقم 8:-

هنجيب التوست أو العيش الكيذر أو العيش وهنحط شرايح الانشون وعليها قطع الزيتون وحلقات الفلفل وفوقيهم الجبنه الموتزريلا  وبعدين هنجيب طاسه على النار ونسيح فيها معلقه كبيره زبده وبعدين هنحط التوست ونشوحه على الجانبين عشان الجبنه تسيح وبالهنا والشفاااا.

☆وأخيراً :- 

 هنحط شرايح الخيار والجزر لأطفالك وكمان متنسيش تعمليلهم عصير فريش أى نوع بيفضلوه وكمان مننساش الفاكهة ياريت لو نحط ثمرة أو أثنين فاكهه وياريت لو يشربوا كوب من اللبن قبل مايروحوا المدرسه عشان تديهم طاقه ونشاط طول اليوم وكمان هيقوى عظامهم لأ حتواءه على الكالسيوم، ونصيحة مهمه بلاش تحطى شرايح الطماطم مع السندوتشات لأنها هتبل الساندوتش ومش هيعرفوا ياكلوه ممكن نستبدلها بشرايح الخيار والخس لأن الخضار مهم جداً لصحة أولادنا، كمان ممكن تحطى فى اللانش بوكس فواكه مجففه هتبقى مفيده ليهم وهتمدهم بالطاقه،ياريت تكون معلوماتى فادتكم والوصفات اللى نزلتها نالت اعجابكوا وبالهنا والشفا.

شاهد أيضاً : - مشروبات مغذيه للأطفال أيام المدارس.

إرسال تعليق

0 تعليقات