طريقه عمل البيض الاسكتلندى والبيض على الطريقه التركيه والبيض فى العجه على الطريقه المصريه

طريقه عمل البيض الاسكتلندى والبيض على الطريقه التركيه والبيض فى العجه على الطريقه المصريه

☆المقادير :- 

10 بيضات بلدى مسلوقه لمده 5 دقايق
3/4 كيلو لحمه مفرومه ناعم
بصله مبشوره ناعم
2معلقه كبيره بقسماط مطحون
رشه سكر
ملعقه صغيره سبع بهارات
ملح وفلفل اسود
☆للتغطيه:-
نص كوب دقيق
2بيضه
2 ملعقه كبيره لبن
كوب بقسماط مطحون
ربع كوب دقيق
ربع كوب نشأ

☆طريقه التحضير :- 

فى وعاء عميق هنخلط اللحمه المفرومه مع البصل والبقسماط، والبهارات السبع ورشه السكر والملح والفلفل الاسود ، هنعجن كل المكونات السابقه مع بعض لغايه ما يبقى معانا خليط متجانس،  هنمسك جزء من اللحمه المفرومه وهنفردها كويس على شكل دايره وبعدين هنحط واحده بيضه مسلوقه فى النص وهنغلفها باللحمه المفرومه كويس جدا ولازم نراعى أن سمك اللحمه المفرومه يكون رفيع عشان يستوى بسرعه ومياخدش وقت طويل فى التسويه،  وهكذا لغايه ما نغلف كل البيض المسلوق باللحمه المفرومه ، هنجيب ثلاث اطباق هنحط فى واحد الدقيق وهنحط فى التانى بيضتين مخفوقين مع معلقتين لبن ورشه ملح وفلفل اسود وهنحط فى الطبق التالت بقسماط مطحون مع ربع كوب دقيق وربع كوب نشأ وملح وفلفل اسود ونخلطهم مع بعض كويس ، هنجيب البيض المغلف باللحمه المفرومه وهنزله فى طبق الدقيق وبعدين نحطه فى البيض وبعدين فى البقسماط وهكذا حتى ننتهي من كل الكميه، هننزل البيض الاسكتلندى فى زيت غزير وساخن لغايه مايحمر وياخد اللون الدهبى الجميل ، هننتشل البيض من الزيت وهنضعه على أوراق تنشيف الزيت وبالهنا والشفا.

☆ثانياً :-البيض على الطريقه التركيه :-

البيض على الطريقه التركيه 

☆المقادير :- 

4 بيضات مسلوقين
2معلقه كبيره زبده
توابل (بابريكا وملح وفلفل أسود وكمون  )
جبنه موتزريلا

☆طريقه التحضير :- 

هنقطع كل بيضه لنصفين وبعدين هنسيح الزبده او السمن البلدى او اى ماده دهنيه انتى عاوزاها  فى طاسه على النار ، هنرص أنصاف البيض فى الطاسه وبعدين هنحط على البيض رشه ملح ورشه فلفل اسود ورشه كمون ورشه بابريكا وهنسيبه لمده ثلاث دقايق وبعدين هنحط الجبنه الموتزريلا على الوش ونغطى الطاسه لغايه ماتسيح الجبنه الموتزريلا،  يقدم مع الكشرى الأصفر أو كطبق جانبى على وجبه الإفطار وبالهنا والشفا.

☆ثالثاً :- طريقه عمل البيض بالعجه على الطريقه المصريه :-

العجه المصريه 

☆المقادير :- 

4 بيضات
1بصله مفرومه متوسطه الحجم
2حبه طماطم مبشوره متوسطه الحجم
مقدار قبضه يد من الخضره
5فصوص ثوم مفروم
معلقه كبيره بيكنج بودر
1/4كوب دقيق
سمن أو زبده

☆طريقة التحضير :- 

فى طاسه على النار شوحى البصل فى معلقتين زبده وقلبى لغايه البصل مايدبل وبعدين هنحط التوم المفروم لمده دقيقتين وبعدين هننزل بالطماطم المبشوره ، هنبشر الطماطم بالمبشره أو نفرمها في الكبه من غير مانضيف ميه يعني طماطم وبس ويفضل إنك تصفيها من القشر،هنسيبهم يتسبكوا شويه وبعدين ننزل بالخضره المفرومه ونقلب بعدين هنرفع الخليط من على النار ونتركه لغايه ما يبرد خالص وبعدين،  فى وعاء أخر هنحط البيض ونخفقه كويس وبعدين نضيف الدقيق والبيكنج بودر  ونقلبهم مع بعض كويس جدا وبعدين هنضيف خليط البصل والطماطم بعد ما برد خالص ونخلط جميع المكونات معا ، بعدين هنشكلها على شكل دايره زى الطعميه بالظبط وبعدين نقليها فى زيت غزير وساخن وبعدين نطلعها على مناديل الورقيه عشان تتشرب الزيت، أو ممكن ندهن صنيه بالزيت ونحط خليط العجه فى الصنيه وندخلها الفرن لمده تلت ساعه ولغاية مايحمر الوجه وممكن نختبرها بخله الأسنان وبعدين نطلعها من الفرن ونقطعها زى الكيكه وممكن نحطها فى قوالب الكب كيك كما موضح في الصوره بالأعلى  ، تقدم كطبق جانبى على وجبه الإفطار وبالهنا والشفا.

-شاهد أيضاً : - طريقه عمل الكشرى والفول والفلافل (الطعميه المصريه ).






إرسال تعليق

0 تعليقات